Iloy nagreklamo vs maestro nga iya gin-alegar nagsuya sa iya bata

Iloilo City —Nagreklamo ang iloy sang 14-anyos nga dalagita nga ginpakahuy-an kag ginhikayan sang maestro sa Iloilo National High School ang iya bata sang nagpa-enroll sila sa eskwelahan.

Suno sa tagreklamo nga si Alyas Xyxy, Agosto 7 sang gintuyo niya nga ipa-enroll ang iya bata sa Grade 9 para sa night class apang ginhambalan sila ni Mr. Gilbert Aborde nga magbalik pagkasunod nga adlaw.

Halin sa La Paz National High School si Alyas Nene nga tuyo kuntani i-transfer sang iya iloy sa INHS.

Dugang pa sang iloy, ginhikayan sang maestro ang grades sang iya bata sang ginpalantaw niya ang card.

“Sang amo to nga time ginpakita ko sa iya ang grade ka bata ko, ginpalantaw ko sa iya kag hambal niya ‘palantawa ko bi ka grade ka bata mo.’ Paglantaw niya nga 84 ang average sang bata ko ginhambalan niya ko nga ‘dinumaan mani nga mga grado man’ amo na hambal niya,” suno kay Xyxy.

Ginpabay-an na lang ni Xyxy kag gin-intiende si Aborde sa pagpati nga basi indi lang maayo ang iya nga modo.

Pagbalik naman sang mag-iloy sa eskwelahan sang Agosto 8, ginpahayag ni Xyxy nga, “ginhambalan niya ko ya nga ‘lantawa bala hitsura sang bata mo ho, daw tomboy man na. Daw gapamulot sa kilid sang basurahan, daw masal-an buang.’”

Dugang niya, “Ginpasulod niya ko. Ginlantaw niya ang card. Gin-picturan niya pa kag kontakon niya kuno ang maestra sang bata ko sa La Paz National High School kay diskumpyado gid siya sa hitsura sang bata ko. Hambal niya ‘maremalaso ko ni sa hitsura sang bata mo.’ Amo na bala hambal niya bala sa office, nakibot ako. Hambal ko ‘ano hitsura ka bata ko haw? Ano na hitsura ka bata ko manugpatay nga amo gid na ihambal mo? Ma-judge kana dayon sa bata nga wala kapa gani kabalo sang batasan?’.”

Ginkomprontar ni Xyxy si Aborde nga indi siya dapat mag-judge tungod maestro siya.

Nagahilibion naman si Nene kag nagpabutyag nga indi na siya mag-eskwela sa INHS.

Pila ka beses nga ginkadtuan sang Aksyon Radyo Iloilo ang INHS agud makuhaan sang pahayag si Aborde apang wala siya maka-report sa eskwelahan.

Na-usisa naman sang principal si Xyxy parte sa natabo apang wala pa sila maka-atubangay liwat ni Aborde. Nagpasalig ang principal nga indi niya pagpabay-an si Nene kun magpa-enroll na sa eskwelahan.

Gin-schedule kuntani sang principal ang ila pag-atubangay las-2 kaina sang hapon apang sang nagkadto ang tiya sang bata sa eskwelahan, wala ang principal kag ang maestro, base sa pagpangusisa sang Aksyon Radyo. —via Firingline