P56K cash nataban sang gin-report gin-ransack ang GCash machine sa convenience store sa La Paz
ILOILO CITY — Nataban ang masobra P56,000 nga cash sa Gcash machine sang ginrasak ang convenience store sa Brgy Jereos, La Paz, pasado las-2 kahapon sang kaagahon, August 15.
Suno kay Police Chief Master Sergeant Venus Gabawa, chief investigator sang La Paz Police Station, halin las-8 sa aga tubtob las-8 sa gab-i lang ang operasyon sang convenience store.
Ginpahayag ni Gabawa nga las-8 kaina sang aga sang may customer nga mabakal kun tani sa store pero nadiskubrihan nga bukas ang pwertahan pero guba ang handle kag wasak ang kadena nga may lock.
Magluwas diri, nakita man sang customer nga naguba ang GCash machine sa sulod sang store gani gilayon niya nga gin-report sa police.
Base sa pag-check sang supervisor sang machine, P56,740 ang nakuha sa sulod sang machine.
Wala naman sang iban pa nga mga items nga nakuha sa convenience store base sa inventory, suno sa police.
Sa pag-review sang CCTV camera sang store, nagasuksok sang t-shirt kag shorts ang naga-isahanon nga suspek nga nagsulod sa store. May ginasuksok man ang suspek nga tabon sa nawong kag naka-helmet.
Ginpabutyag ni Gawaba nga indi klaro ang CCTV tungod madulom kag kaagahon natabo ang insidente.
Padayon ang hot pursuit operation sang police agud makita ang suspek kag pag-check sa mga CCTV nga posible naka-capture sang natabo.
