BREAKING: Iloilo City Councilor Plaridel Nava ma-resign bilang konsehal sa Setyembre 1

ILOILO CITY — Ginkumpirmar ni Councilor Plaridel Nava sa Aksyon Radyo Iloilo nga ma-resign siya bilang konsehal sa Setyembre 1.

Ginpahayag sang konsehal nga nag-abot na sa punto nga nadulaan na siya sang gana sa politika kag indi na siya sadtu ang Plaridel Nava nga masupog nga nagapangapin sang mga tawo sa City Hall ukon kilala nga fiscalizer sa City Council.

Gin-ako niya nga tungod sa luyag niya nga magtawhay ang iya kabuhi, nangin ka-alyado na siya ni Mayor Jerry Treñas tubtob nag-abot sa punto nga nadula na ang iya identity kag nabatyagan niya nga “daw inutil” na siya.

Tiun na suno sa iya nga unahon niya ang iya pamilya.

Plano sang pamilya ni Nava nga mag-migrate sa Amerika tungod lunsay American citizens naman ang iya duha ka kabataan.

Ginpahibalo man sang konsehal nga indi na siya magbalik sa politika sa tiun nga magpadulong sila sang iya pamilya sa Amerika.

Gina-endorse naman ni Nava nga magabulos sa iya ang iya kapartido nga si Atty. Dan Cartagena.