ILOILO CITY — Nadakpan sa drug buy bust operation ang ginakabig high value individual sa sulod sang pension house sa Ledesma Street, Brgy. Gloria, City Proper kahapon sang kaagahon.
Ginkilala ang subject kay Ana Pedrajas, 48-anyos sang Poblacion South, Oton.
Magluwas nga HVI, ginareklamo man nga scammer si Pedrajas tungod madamo siya sang may nabiktima kag napasakaan na siya sang kaso nga estafa apang nakapiyansa.
Nakuha kay Pedrajas ang 23 ka sachets sang suspected shabu nga ginabanta nagabalor sang P476,000, buy bust money nga P8,000, cellphone kag iban pa nga non-drug items.
Suno kay Police Lieutenant Colonel Antonio Benitez Jr., Head sang City Drug Enforcement Unit sang Iloilo City Police Office, yara sa drug watchlist sang CDEU ang ngalan ni Pedrajas.
Base sa impormasyon nga ginpalab-ut sa police, naga-engage sa pagbaligya sang illegal nga druga si Pedrajas rason nga gin-monitor sa sulod sang duha ka semana antes gin-conduct ang buy bust operation.
Sa pagpangusisa sang CDEU, sa Manila nagakuha sang supply si Pedrajas.
Natalana nga pasakaan sang kaso si Pedrajas suno kay Colonel Benitez.
