6 ka tuig nga bata nga babaye patay sang nabungguan sang motorsiklo sa Guimbal

ILOILO — Patay ang anum ka tuig nga bata nga babaye sang nabungguan sang motorsiklo sa Balantad-Carlos Fruto, Guimbal las-5:48 kahapon sang hapon, Agosto 23.

Suno kay Police Corporal Tommy Macalalag, imbestigador sang Guimbal Municipal Police Station, dungan nga nagpanaug ang bata upod sa iya amay sa tricycle.

Nagtabok ang bata sa karsada kag nabungguan sang motorsiklo nga ginamaneho ni Alex Castañares Jr. nga taga-Guimbal man.

Ginpahayag sang mga nakakita nga medyo madasig ang pagmaneho sang driver sang motorsiklo, suno kay Macalalag.

Sa video nga ginpadala sa Aksyon Radyo Iloilo, nagtabog gid ang bata sang nabungguan sang motorsiklo.

Gindala pa sa ospital ang bata pero gindeklarar nga dead-on-arrival.

Detained na sa Guimbal Police Station ang driver sang motorsiklo.