35-anyos nga lalaki patay sang ginlabu sa Tubungan

ILOILO — Patay ang 35-anyos nga lalaki sang ginlabu sa Barangay Sibucauan, Tubungan kahapon, Agosto 30.

Ginkilala ang napatay kay Jolibe Saril sang Brgy. San Jose, Tubungan.

Suno kay Police Captain Rodel Ojano, hepe sang Tubungan Municipal Police Station, nagabantay ang biktima sang iya mga baligya nga bubod sang gulpi lang nag-abut ang suspect nga si Domingo Guantia, 40-anyos kag may dala nga binangon.

Ginpahayag sang police nga gulpi lang ginlabu sang suspect ang biktima kag naigo sa nagkalain-lain nga parte sang lawas.

Gilayon naman nga nagpalagyo ang suspect sakay sa iya motorsiklo suno sa police.

Base sa imbestigasyon sang police, naka-inom ang suspect sang ginhimo ang krimen.

Ginpabutyag sang suspect nga antes ang insidente, ginhambalan siya sang biktima nga patyon gani gin-unahan na lang niya labu, suno sa police.

Gindala sa Rural Health Unit sang Tubungan ang biktima kag gin-refer sa Western Visayas Medical Center (WVMC) pero wala gid natabangan.

Nadakpan sang police ang suspek sa Brgy. San Jose, Tubungan sa ila hot pursuit operation.