RORO vessel halin Palawan, nagsadsad sa Parola Wharf

ILOILO CITY – Nagkinaran-karan ang mga nagabantay sa Parola Wharf sang nagsadsad sa pantalan ang RORO vessel nga M/V D’Asean Journey halin sa Palawan pasado las-siete kahapon sang aga, Agosto 31.

Nagupi ang porsyon sang atop sang walkway tungod nabungguan sang unahan sang barko.

Natabuan nga wala sang fiber boat nga nakadungka sa lugar nga nadiretsuhan sang RORO vessel gani wala na sang iban nga na-damage.

Wala man sang napilasan sa 109 ka pasahero sang RORO vessel kag sa mga yara sa pantalan.

Suno sa kapitan nga si Ronald Joey Galon, nadulaan siya sang kontrol sa timon.

Malapit na sila sa Parola Wharf suno kay Galon sang may nag-agi sa ila atubang nga fiber boat nga pakadto sa Guimaras gani nga ginpahinay niya ang kadasigon pero tungod mabaskog ang current sang tubig, nadala sila tubtob nagdiretso sa pantalan. —via Justice Savvanah Pamplona