PRO 6 wala sang may na-record nga dalagku nga insidente sa pag-file sang COC para sa 2023 BSKE
Wala sang may na-record nga dalagku nga insidente sa Western Visayas ang Police Regional Office (PRO) 6 sa anum ka adlaw nga filing sang Certificate of Candidacy (COC) para sa Barangay kag Sangguniang Kabataan Election nga nag-umpisa sang Agosto 28 kag nagtakop kahapon, Setyembre 2.
Ini ang base sa assessment sang PRO 6.
Suno kay PRO 6 spokesperson Police Major Mary Grace Borio, matawhay ang proseso sang tagsa ka mga gin-designate nga lugar sa pagbaton sang COC sang Commission on Elections (COMELEC) sa mga probinsiya sa rehiyon.
Gin-activate man sang PRO 6 ang police assistance desk nga naka-standby sa mga kabanwahanan agud magbulig sa pagbantay sang seguridad.
Padayon nga naga-monitor kag naga-conduct sang checkpoints ang kapulisan agud nga mapasiguro nga mapatuman ang gun ban.
Sa data sang PRO 6, duha ang nagkaladakpan tungod sa paglapas sang gun ban kag lunsay halin sa Iloilo City.
