ILOILO CITY— Ginabanta P1, 680,000 ang balor sang kahalitan sang nasunog ang baligyaan sang chandelier sa San Rafael, Mandurriao kahapon, Setyembre 11.
Suno kay SFO1 Jake Ronald Solis, investigator sang BFP Iloilo City, ini ang base sa assessment nila sa structure nga nasunog. Wala pa makadeklarar ang tag-iya kun pila ang balor sang kahalitan sa nasunog nga mga baligya.
Gina-imbestigaran pa tubtob subong ang ginhalinan sang sunog, suno kay Solis.
Pero base sa initial nila nga pagpangusisa, una nga nag-aso ang kisame sang 1st floor kag naglaton lang ang kalayo sa iban nga parte sang building.
Nahamtang sa 1st floor ang mga baligya nga chandelier samtang sa 2nd floor ang mga stocks kag opisina.
Nabudlayan sa pagsulod ang mga bombero tungod kristal ang dingding sang baligyaan nga ginakahangaw-an magpisik kag maigo ang iban nga volunteer responders.
Pulo ka firetrucks ang nagresponder sa lugar.
Gindeklarar nga fire out las-2:10 sang hapon.
