2 lakip ang menor-de-edad nga ginapatihan runner sang illegal drugs dakup sa buy bust operation sa Molo

ILOILO CITY— Duha ang nadakpan sa drug buy bust operation sa Zone 6, Brgy. Boulevard, Molo kagab-i, Setyembre 13.

Ginkilala ang subject kay Genesis Selorio, 26-anyos nga manuglibod sang cutting disc kag residente sang amo man nga lugar.

Nadakpan man sa operasyon ang menor-de-edad nga lalaki nga ginapatihan runner sang subject.

Suno kay Police Major Marlyn Roquero, officer in charge sang Molo Police Station, tatlo ka semana nila nga gin-monitor ang subject tubtob gin-operate.

Ginpahayag ni Roquero nga sa balay sang subject nagakatabu ang transakyon sa illegal drugs ukon ginapadul-ong niya sa menor-de-edad nga runner.

Na-recover sang police subong nga gab-i ang siyam ka sachets sang suspected shabu nga nagabug-at sang 30 grams kag may standard drug price nga P333,200.

Sa interview sang Aksyon Radyo Iloilo News team kay Selorio, gin-ako niya nga nagagamit kag nagabaligya siya sang illegal drugs pero nanindugan nga indi halin sa iya ang mga na-recover nga suspected shabu kundi halin sa menor-de-edad kag gin-“planted” lang sa iya.

I-turn over ang menor-de-edad sa DSWD agud i-assess kun ano ang nagakaigo nga intervention sa iya.

Presu naman si Selorio sa Molo Police Station.