Taxi driver kag iya pasahero nga nagreklamo bangud gin-agi niya sa lain nga ruta, nagpasensyahanay na

ILOILO CITY – Nagkitaay kahapon sa opisina sang Public Safety and Transportation Management Office ang taxi driver kag ang iya pasahero nga nagreklamo tungod gin-agi niya sa lain nga ruta.

Ginpatung-an ni PSTMO Head Jeck Conlu ang pag-istoryahanay sang magtimbang nga bahin. Paathag ni Conlu, resulta ini sang ila kaugalingon nga imbestigasyon sa natabu. Una nga gin-istorya ang magtimbang nga bahin sa separado nga kuwarto antes sila nag-atubangay.

Suno kay Conlu, may miscommunication lang nga natabu.

Sa ila pag-istoryahanay, ginsulit sang taxi driver nga si Ronald Gape nga wala sang condom sa iya taxi nga ginmaneho kag wala siya sang malain nga ginhimo sa pasahero. Ginpasiguro niya man nga safe ang iya mga pasahero kun magsakay sa iya unit.

Nag-sorry man si Liza kag gin-athag nga gin-share niya sa social media ang iya experyensya tungod ginkadlukan siya. Ini tungod nagahalong lang siya kag luyag niya nga safe nga makapauli sa iya bana kag bata.

Pagkatapos sang istoryahanay, nagpasensyahanay man ang magtimbang nga bahin kag nagkumustahanay. —via Justice Savvanah Pamplona