1 patay, 1 pilason sa tropa sang mga suldado sa nagluntad nga engkwentro sa Jayubo, Lambunao
ILOILO — Isa ang patay kag isa ang pilason sa tropa sang 82nd Infantry Battalion, 3rd Infantry Division sang Philippine Army sa engkwentro batok sa mga miyembro sang New People’s Army sa Brgy. Jayubo, Lambunao kahapon sang aga, Setyembre 19.
Suno kay Lt. Colonel J-jay Javines, chief sang 3rd ID Public Affairs Office, nakabaton sang report ang mga suldado nga may miyembro sang rebelde nga grupo nga nagahimo sang extortion activity rason nga ginrespondehan.
Ginabanta 10 ka mga miyembro sang Baloy Platoon, Central Front Komiteng Rehiyon Panay ang na-engkwentro sang mga suldado nga naglawig sang ginabanta isa ka oras.
Gin-airlift kag gindala sa ospital ang napilasan nga mga suldado pero gindeklarar nga dead-on-arrival si Private First Class Mars Echevarria, samtang estable na ang kondisyon ni PFC Joemarie Llesis.
Pagkahapon, samtang nagahimo sang clearing operation ang mga suldado, may nakit-an nga bangkay sang lalaki nga ginapatihan miyembro sang NPA, pila ka metros halin sa natabuan sang engkwentro.
Ginapatihan sang mga residente sa lugar nga posible ginbilin sang iya mga kaupod ang bangkay sa tiun nga nagapalagyo sila.
