ILOILO CITY – Nangin mainit ang una nga hugnat sang Nga-a Ikaw: The Aksyon Radyo Iloilo Candidates’ Forum-Barangay Edition sang Aksyon Radyo Iloilo nga nagsugod sa Barangay Kasing-Kasing, Molo kahapon.
Sa apat ka aspirants, nagtambong kanday former Kapitan Gemma Calzado, former Kapitan Tomas “Bebot” Enriquez, kag former Kagawad Rey Calzado, samtang wala si incumbent Punong Barangay Allen Villuga tungod sa family emergency.
Sa opening statement, ginpakilala sang kada kandidato ang ila kaugalingon kag kun ginplastar ang mangin programa. Suno kay former Kagawad Calzado, tutukan niya ang problema sa mga menor-de-edad bangud madamo ang bayolente na. Ginpalabtikan pa niya ang barangay official nga nagapanag-iya sang computeran tungod wala suno sa iya nagapaminsar sa mga menor.
Katawhayan naman kag liwat nga pagpatahom sa barangay ang tutukan ni former Kapitan Enriquez. Gintumod niya man ang pagdisiplina sa mga menor-de-edad nga masami suno sa iya nagapanggamo ilabe na kun gab-i.
Samtang awayon ni former Kapitan Calzado ang illegal drugs. Paathag niya, masakit nga nangin biktima siya sang napreso may kaangtanan sa illegal drugs, pero na-clear na ang iya pangalan gani nga liwat siya nakapadalagan.
AWAY SA ILLEGAL DRUGS
Lunsay nagpasalig ang mga aspirants nga tutukan ang pag-away sa problema sa illegal drugs.
Suno kay former Kagawad Rey Calzado, kun siya ang mapungko nga kapitan, mapatawag siya sang barangay assembly kag i-identify ang mga naga-intra sa illegal nga druga. Edukaron suno sa iya ang mga involved agud nga malikaw sila sa illegal drugs.
Nagpa-andam naman si Enriquez nga handa siya mapatay sa pag-away sa illegal drugs gani dapat nga untatan na ini sang mga involved. Ginpabugal pa niya nga sa iya administrasyon sadto nagtawhay ang ila nga barangay.
Ginpabutyag naman ni former Kapitan Calzado nga akig siya sa illegal drugs kag nakahibalo siya mag-away sini bisan babaye siya. Nagpabutyag man sang kahanda si Calzado nga magpa-drug test ano man nga oras agud pamatud-an nga wala siya naga-intra sa illegal drugs tungod nga inosente siya sang ginpreso sang una.
PROBLEMA SA MGA PAMATAN-ON
Nagplastar naman ang tatlo sang ila mga programa agud masolbar ang mga problema nga gina-ulamiran sang pamatan-on.
Suno kay former Kagawad Calzado, ma-coordinate siya sa DSWD kag PNP, kag ipatawag ang ginikanan sang mga pamantan-on. Dapat suno sa iya nga may matarong nga kapitan sa pagdisiplina sa mga pasaway nga minors.
Nagpasalig man si Enriquez nga masarangan niya disiplinahon ang mga menor-de-edad paagi sa pag-istorya sa ila. Kinahanglan suno sa iya sang mga pamatan-on nga may malaygay kag magpa-athag sa ila agud makamarasmas sila nga indi manami ang pagpanggamo kag pagpasaway.
Ginpabutyag naman ni former Kapitan Calzado nga bisan wala siya sang bata pero ginkonsiderar niya ang pumuluyo sang barangay nga iya mga bata. Nagapati siya nga dapat maumpisa sa ginikanan ang pag-disiplina kag indi lang pag-isalig sa mga barangay officials.
