ILOILO – Patay na sang nasapwan sa abandonado nga balay ang 72-anyos nga lalaki nga may pilas sang pagkabuno sa Barangay Bacay, Dumangas kahapon sang aga, Setyembre 25.
Ginkilala ang biktima kay Levi Burgos, tumandok sang Cari Mayor, Leganes, samtang suspek naman si Romeo Defiesta, 60, sang Anilao. Lunsay temporaryo nga naga-istar sa Brgy. Bacay ang duha.
Suno kay Police Master Sergeant Ramon Baylon, imbestigador sang Dumangas Police Station, naga-inum-inom ang biktima kag ang suspek upod ang duha pa ka lalaki sa balay antes natabo ang insidente.
Base sa imbestigasyon sang Dumangas police, gindul-ong sang duha ka lalaki si Burgos sa abandonado nga balay agud patulugon. Pero pagbalik sang duha nagpangakig si Defiesta kun ngaa ginpatulog didto ang biktima tungod sa abandonado nga balay man siya kuntani matulog.
Sa pagpangusisa sang police sa mga residente, may nabatian sila nga nagasabtanay sa abandonado nga balay kagab-i, pero gulpi lang nga naglinong.
May pilas sa dughan ang biktima kag na-recover sa lugar ang kutsilyo nga posible gingamit sa pagpangbuno.
Nadakpan naman sa hot pursuit operation ang suspek nga preso na sa Dumangas Police Station.
