“Control ang movement [sang mga salakyan] — DPWH 6 OIC, Engr. Sanny Boy Oropel kun nga-a 2 lanes lang sang Ungka Flyover ang ginbuksan

ILOILO CITY – Ginsabat ni Department of Public Works and Highways (DWPH) 6 OIC, Engr. Sanny Boy Oropel kun nga-a duha lang ka lanes sang Ungka Flyover ang ginapa-agyan sa mga light vehicles.

Suno kay Oropel, luyag nila nga ma-control ang movement sang mga salakyan. Ginakahangaw-an nga magpinagusto overtake ang mga salakyan kun lubos nga buksan ang tanan nga lanes sang flyover. Tuyo nila nga ma-control ang trapiko.

Nanindugan si Oropel nga safety sang mga motorista lang ang ila ginakonsiderar.

“[I]s only to control ang movement. Kun i-allow naton dira ang four lanes basi ma-inovertake-anay [ang mga salakyan] kag indi na naton ma-control ang traffic that is why we decided nga inner lane lang [ang buksan] para ma-control dira,” suno kay Engr. Oropel sa ginpatawag nga meeting sang Iloilo City Council.

Ginpaathag man niya nga ginabuksan lang ang Ungka Flyover kun rush hour agud mahagan-hagan ang pagpugok sang mga salakyan sa idalom sang proyekto.

Setyembre 22 sang liwat nga ginbuksan sa mga light vehicles ang flyover halin las-seis sa aga tubtob las-nueve sa aga, kag las-kuwatro sa hapon tubtob las-otso sa gab-i.