Pangayaw patay sang natiruhan sa Alimodian

ILOILO — Patay ang pangayaw nga lalaki sang natiruhan sa national highway nga sakop sang Brgy. Bancal, Alimodian las-9:50 kagab-i, Oktubre 5.

Ginkilala ang biktima kay Carlo Alleta, residente sang Brgy. Bo. Obrero, Lapuz.

Suno kay Police Staff Sergeant Angelo Amoyan, imbestigador sang Alimodian Municipal Police Station, nagasakay sa motorsiklo ang biktima halin sa Iloilo City kag padulong kuntani sa Leon sang gintiro sang wala makilal-an nga suspetsado pag-abot sa unhan sang Aleosan District Hospital.

Posible suno sa police nga ginsundan na ang biktima ukon ginbantayan lang sang duha ka mga suspect kag gintiro.

Indi pa ma-establisar kun pila ka motorsiklo ang ginsakyan sang suspetsado, suno sa police.

Antes nasapwan ang biktima, nakabati sang sunod-sunod nga lupok sang pusil ang mga residente malapit sa lugar.

Gindala pa sa ospital ang biktima pero gindeklarar nga dead-on-arrival tungod sang duha tubtob tatlo ka pilas sang pagkatiro sa ulo kag apat ka pilas sa lawas, suno sa police.

14 ka basiyo sang 9mm kag anum ka basiyo sang 45 caliber pistol ang na-recover sang police sa crime scene.

Padayon pa nga gina-imbestigaran sang police ang insidente.