ILOILO — Nagpasar sang resolution ang Association of Barangay Captains sa Sara agud mag-request sang dugang nga pulis sa pagpabilin sang kalinong kag katawhay sa October 30 Barangay kag Sangguniang Kabataan Elections.
Suno kay Tady Punong Barangay Emmanuel Engle, 35 sa 42 ka mga kapitan sa Sara ang nagpirma sang resolusyon.
Nagakabalaka si Engle tungod yara sa bukid, sa boundary sang Capiz, ang ila barangay.
Magluwas sa Brgy. Tady, nagakahangawa man suno kay Engle ang mga kapitan sang Bakabak kag Preciosa rason nga suportado man nila ang resolusyon.
Antes mag-umpisa ang campaign period, nagpaguwa suno pa kay Engle sang order si Mayor Jon Aying nga tipunon ang mga hand-held radios sang mga kapitan. Wala siya nakahibalo kun ano ang nangin rason sang alkalde sa pagkuha sang mga radyo.
Tungod sini nagakabalaka ang kapitan nga magahinay ang pagresponder sa tiun sang emerhensya tungod wala sila sang gamiton sa komunikasyon kun magpangayo sang bulig sa mga emergency units nga nakabase sa banwa.
MAHULAT SA MANDU SANG PRO 6
Hulaton sang Iloilo Police Provincial Office (IPPO) ang mandu sang Police Regional Office 6 (PRO) 6 may kaangtanan sa resolution sang ABC Sara.
Suno kay IPPO Spokesperson, PMAJ Rolando Araño, handa sila magbulig sa banwa kun ginakabalak-an nila ang ila seguridad.
Base sa monitoring sang IPPO sa Sara, wala sang na-record nga mga insidente may kaangtanan sa eleksyon.
Ginpasiguro sang IPPO nga may naka-standby nga mga pulis sa Sara ilabe na gid nga nagsugod na ang campaign period subong nga adlaw. —via Cedrick Anona
