School-based tribes competition ginbalik sa Dinagyang 2024
ILOILO CITY — Ginbalik ang school-based tribes competition para sa Dinagyang Festival 2024.
Ini tungod balik na sa face-to-face ang klase sa mga buluthuan kag madamo ang nagpahibalo nga mapasakop sa kompetisyon.
Sa 100-day Countdown sang Dinagyang 2024 sang Oktubre 20, gin-anunsyar ang walo ka mga school-based tribes nga mapasundayag nga amo ang Tribu Sigabong sang Ramon Avanceña National High School; Paghidaet sang La Paz NHS; Ilonganon sang Jalandoni Memorial NHS; Tribu Salognon sang Jaro NHS; Tribu Silak sang Iloilo City NHS; Tribu Mandu-riyaw sang Mandurriao NHS; Pan-ay sang Fort San Pedro NHS; kag Tribu Taga-Baryo sang Bo. Obrero NHS.
Ginkalipay man ni Iloilo Festivals Foundation, Incorporated, President, Mr. Allan Tan, ang pagbalik sang school-based tribes tungod mas madamo suno sa iya ang supporters halin sa tagsa ka mga eskwelahan.
Sang Dinagyang 2023, walo ka barangay-based tribes ang nagpasakop sa “Dagyang sa Barangay” competition sa diin gindeklarar nga kampeon ang Tribu Pari-anon.
Sa masunod nga tuig, magapa-indis indis ang barangay-based tribes sa ‘Sadsad sa Calle Real’ competition.
Ang highlights sang Dinagyang 2024 gintalana sa Enero 26 tubtob 28 kag may tema nga “Pagdayaw kay Señor Santo Niño, Padayaw sang mga Ilonggo!”
