Pamilya sang preso nga nagkagat kay Pat. Gilbert Ajeno sa Lambunao wala ginabasol ang pulis sa pagpugos sa iya utod

ILOILO —Nahangpan sang pamilya ang pagpugos sang mga pulis sa ila himata nga si Jeff sang ginpreso sang Sabado sang gab-i, Nobyembre 25.

Si Jeff ang ginpreso tungod nga gintudlo nga nagbuno kay alyas Jed sa Brgy. Natividad, Lambunao.

Ginkagat ni Jeff si Pat. Gilbert Ajeno rason nga nautod gid ang punta sang tuo nga middle finger sang pulis.

Antes ginkagat ni Jeff si Ajeno, ginpugos siya sang mga pulis agud nga maposasan tungod nga nagawaras sa sulod sang karsel.

Ginsaysay sang utod nga nakita man nila sang iya iloy kag iban pa nga himata ang natabu tungod nagkadto sila sa police station sang gindakup si Jeff.

Samtang nagawaras, naghambal ang isa ka pulis nga sudlon si Jeff tungod nga ginabulya-bulya niya ang puwertahan sang karsel. Naghambal suno sa utod si Pat. Ajeno nga pabay-an lang ang preso tungod posible man nga maghipos pero nagsulod gid ang pulis.

Sang indi masarangan sang pulis si Jeff, nagsulod man si Pat. Ajeno kag ang utod ni Jeff agud magbulig. Posible suno sa utod nga indi makaginhawa sang maayo si Jeff gani nga ginkagat niya kun sin-o ang iya malab-ut agud buy-an siya. Ang tudlo ni Pat. Ajeno ang nalab-ut ni Jeff kag nautod gid ang punta (halin sa una nga buko-buko).

“Waay namon nabasol ang pulis kay indi masarangan [akon magulang]. Naluoy gani ko kay [Pat. Gilbert] Ajeno kay nautod ang tudlo niya,” suno pa sa utod.

Hubog si Jeff suno sa iya utod sang gindakup kag ginkagat ang pulis.

Natalana nga isaylo sa Western Visayas Medical Center si Pat. Ajeno para operahan. —via Maria Kayla Tingzon