ILOILO–Patay ang Punong Barangay sang Tamocol, Badiangan sang ginbuno sang magtiyo sa Brgy. Poblacion sang Disyembre 16 sang gab-i.
Ginkilala ni Police Senior Master Sergeant Chris Vincent Conserva, imbestigador sang Badiangan Municipal Police Station ang biktima kay Bernard Adorador.
May ginhiwat nga opening of lights sa plaza sang Brgy. Poblacion suno sa police kag upod nga nag-inom-inum ang biktima kag ang suspects nga kanday alyas Toto sang Brgy. Poblacion, Lambunao kag iya hinablos nga si Nonoy sang Brgy. Talaba, Badiangan.
Nagbaisay ang magtiyo tubtob nga nagginamo na, suno sa police.
Ginpahayag sang police nga nakita na lang sang mga tawo si Kapitan Adorador nga natumba pero wala sila sang may nakita nga dugo nga nagaguwa sa iya lawas gani gindala sa ospital.
Gin-refer si Adorador sa Western Visayas Medical Center pero gindeklarar nga dead-on-arrival kag natukiban nga may pilas siya sang pagkabuno sa tiyan kag dughan.
Sa pagpangusisa sang police, ginatudlo sang mga nakakita nga ang magtiyo ang nagbuno sa biktima.
Nadakpan ang mga suspek sa hot pursuit operation sang police kag natalana nga pasakaan sang kaso.
