ILOILO CITY— Masobra P1.3 million nga balor sang suspected shabu ang na-recover sa 24-anyos nga lalaki sa Brgy Muelle Loney, City Proper kagab-i, Enero 16.
Ginkilala ang subject kay Angelo Geminez, 24-anyos nga tumandok sang amo man nga lugar.
Suno kag Police Captain Roque Gemino III, OIC sang City Proper Police Station, una nga na-recover sa drug buy bust operation kay Geminez ang pulo ka sachets sang suspected shabu nga nagabug-at sang 95grams kag nagabalor sang P646,000.
Pagkatapos sang drug buy bust operation, ginserbihan pa gid sang search warrant ang subject kag nakuha sa iya nga kwarto ang caliber .38 nga pusil kag 100 grams sang suspected shabu nga nagabalor sang P680,000.
Sa impormasyon sang pulis, kahapon lang nag-abut ang stocks sang illegal drugs sang subject.
Apat ka bulan nga gin-monitor ang illegal activities sang subject tubtob nadakpan, suno kay Gemino.
Si Geminez suno sa police ang naga-deliver sadto sang illegal drugs halin kay Angelito Colminares nga nadakpan man sadto sa drug buy bust operation sang PDEA.
Ginhimo ang operasyon sang City Proper Station Drug Enforcement Team (SDET), City Drug Enforcement Unit (CDEU), kag Molo Police..
