Estudyante nga gintiro sa sulod sang Guimaras State University patay, musical director nga gintiro man padayon nga ginabulong sa ospital

GUIMARAS —Ginkumpirmar sang Buenavista Police nga napatay samtang ginabulong sa ospital si Christine Mae Piamante, 22, residente sang Barangay Cabungahan, San Lorenzo, Guimaras nga gintiro sa sulod sang Guimaras State University sa Buenavista.

May patal nga pilas ulo ang biktima nga gintunaan sang iya kamatayon.

Samtang, padayon nga ginabulong sa ospital si Ram Arlo Tacubay, musical director sang nasambit nga unibersidad nga gintiro man.

Suspek si Zoilo Sereño, ex-boyfriend ni Piamonte, residente sang Brgy. Zone 6, Pulupandan, Negros Occidental, kag casual employee sang Rural Health Unit sa ila lugar.

Sa imbestigasyon sang Buenavista police, nag-ayo ang suspek sa security guard sang GSU nga makasulod agud maghatag sang allowance sa biktima.

Ginadudahan sang suspek nga magkarelasyon sanday Piamonte kag Tacubay nga nagresulta sang pagpangluthang sa mga biktima.

Nadakpan ang suspek nga nag-ako sa krimen. “Wala gid ko ‘ya tani [plano nga ipaagi] sa dahas ‘ya. Lawig-lawig ko di sa guwa. Libot-libot pangita siya, wala siya. Asta nagbinutig ko eh. Nagsulod ko sa GSU nga makigkita ko may dul-ungan ko kuwarta. Asta nga pagsulod ko sa kuwarto baw, nakita ko dayon nagahaksanay sila gina-agbayan pa siya ghinalukan pa siya sang laki. Te amo to eh, nabal-an ko gid ang kamatuoran.”

Preso si Sereño sa Buenavista Police Station kag kasuhan sang murder kag frustrated murder.

Suno kay Colonel Santos, sa ila imbestigasyon, tatlo ka tuig ang nangin relasyon nanday Piamonte kag Sereño antes nagbulagay.—via Cedrick Anona/Angel Mae Ciudad