ILOILO —Nagsugod na ang una nga phase sa pagkay-o sang Ungka Flyover, suno kay Department of Public Works and Highways (DPWH) 6 OIC, Engr. Sanny Boy Oropel.
Ginpahayag ni Oropel nga natapos na ang pre-construction meeting sang DPWH 6 kag nagdaug nga contractor nga Monolithic Construction & Concrete Products, Inc. sang na-issue ang kontrata kag Notice to Proceed.
Nag-umpisa ang program of works sa pagbutang sang baral sa isa ka lane agud nga makabutang sang shoring ukon tukod sa 13 ka mga haligi sang flyover kag maka-conduct sang “intense jet grouting.”
Unahon sang kontraktor sa pagbutang sang tukod ang ikapito, ikawalo kag ikasiyam nga haligi sang flyover.
Suno pa kay Oropel, ginplanuhan kag quality materials ang ibutang sang DPWH 6 sa pagtukod sa mga haligi.
Gin-athag man niya nga ang una nga shoring kag jet grouting sa ikatatlo, ika-apat kag ikalima nga haligi ang ginhimo sang International Builders Corporation (IBC) nga amo ang contractor sang proyekto.
