ILOILO CITY – Ginplastar sang Iloilo City Traffic Management Unit (ICTMU) ang road rerouting scheme para sa mga public utility jeepneys (PUJs) sa temporaryo nga pagsirado sang mga dalan malapit sa Jaro plaza may kaangtanan sa kapiyestahan ni Nuestra Señora dela Candelaria.
Las-2:00 subong nga hapon may himuon nga Opening Salvo para sa kapiyestahan, kag las-3:00 sang hapon sa Pebrero 2, may solemn procession.
Ginpahayag ni ICTMU Head, Retired Colonel Uldarico Garbanzos nga indi makasulod ang mga salakyan sa mga maagyan sang parada kag prusisyongani magapatuman sang road rerouting.
Ang mga PUJs halin sa Bito-on via Balabago, Jaro tubtob na lang sa rotonda sa Tabuc Suba kag mabalik sa Bito-on.
Ang mga PUJs naman halin sa Tagbak Terminal nga mapadulong sa City Proper, pag-abot sa Democracia, maliko padulong sa Cabangbang Street (antes sang CPU), matabok sa Lopez Jaena tubtob sa gate 3 sang CPU kag maliko padulong sa Cuartero tubtob makaguwa sa Diversion Road. Pag-abot sa Diversion Road, maliko padulong sa Jalandoni Street, kag maliko pasulod sa Magsaysay, La Paz (Iloilo Sports Complex), kag maguwa sa Luna Street.
Ang mga PUJs nga Ungka via CPU, pag-abot sa Cabangbang Street, pareho nga ruta sang mga PUJs halin sa Tagbak Terminal ang dapat agyan agud makalikaw man sa Jaro Plaza. Ang mga mapadulong sa La Paz naman via Jaro Plaza, pareho nga ruta sang mga PUJs halin sa Tagbak Terminal ang dapat agyan. Pero pagguwa sa Luna Street, La Paz, mabalik padulong sa Javellana Street, agud makapadulong sa La Paz plaza.
Samtang ang Mandurriao nga jeep nga mapadulong sa Jaro Plaza, pag-abot sa Diversion Road, matabok sa Cuartero, Jaro (JIGA) kag magguwa sa El 98, maliko padulong sa Jaro Public Market, kag balik sa Diversion Road.
Nagpangabay sang paghangop si Garbanzos tungod sa huol nga matuga sang road closure. Ginpasalig niya nga mabalik man gilayon sa normal ang ruta pagkatapos sang mga aktibidad.
