Malapit P5 million nga balor sang suspected shabu na-recover sa mag-live in partner sa Santa Barbara, Iloilo
Nagalab-ut sa 730 grams sang suspected shabu nga nagabalor sang P4,964,000 ang na-recover sa drug buy bust operation sa Brgy. Balabag, Santa Barbara kahapon, Enero 31.
Suno kay Police Captain Glenn Soliman sang Regional Police Drug Enforcement Unit (RPDEU), nadakpan ang mag-live in partner nga kanday alyas Dindo, 43-anyos sang Brgy. Calaparan, Arevalo, kag alyas Dina, 40-anyos sang Iloilo City Proper.
Nabaklan ang duha sang isa ka sachet sang suspected shabu sa balor nga P26,000. Na-recover pa gid ang dugang nga walo ka knot tied sachets kag anum ka magagmay nga sachets sang suspected shabu.
Na-monitor ang illegal nga aktibidad sang duha tungod si Dindo ang ginatudlo nga nagsugo kag ginakuhaan sang illegal drugs sang menor-de-edad nga nadakpan sang nagligad nga tuig sa drug buy bust operation sa Arevalo, suno pa kay Soliman.
Ginpahayag ni Soliman nga nalakip man sa regional priority HVI (high value individual) si Dindo, samtang HVI naman si Dina. Pareho nga nakaagi na presu sang tag-duha ka beses ang mag-live partner, dugang sang pulis.
Tungod sang illegal nga aktibidad, madamo sang gina-istaran nga balay kag nagasaylo-saylo ang maglive-in partner, suno kay Soliman.
Sa impormasyon nga nakalab-ut sa police, ginakuha sang duha ang supply sang illegal drugs sa Iloilo City kag gina-distribute nila sa bilog nga probinsya.
