UPDATE: Driver sang awto nga involved sa vehicular accident sa Diversion Road, Mandurriao napatay samtang ginabulong sa ospital

ILOILO CITY—Napatay samtang ginabulong sa ospital ang driver sang awto nga ginkilala kay alyas Jey sang Cubay, Jaro nga involved sa nagluntad nga vehicular accident sa Diversion Road, San Rafael, Mandurriao pasado las-4 kaina sang kaagahon.

Suno kay Police Master Sergeant Toto Carl Petalco, traffic investigator sang Mandurriao Police Station, severe head injury ang ginhalinan sang kamatayon sang biktima base sa attending physician sang Iloilo Doctors Hospital.

Ginpahayag pa ni Petalco nga naglapaw sa lane nga gina-agyan sang nagasumalang nga depasahero nga jeep ang awto nga ginamaneho sang biktima.

Posible nga maliko pakadto sa service road ang awto kag na-alang-alang rason nga lumapaw sa lane sang jeep, suno kay Petalco.

Indi pa matumod ni Petalco kun naka-inum ang biktima.

Nag-aregluhanay naman ang pamilya sang biktima kag driver sang depasahero nga jeep nga magbuligay na lang sang gastos sa pagpalubong sang biktima.

Matandaan nga halos 10 minutos nga naipit ang biktima sa driver’s seat sang awto antes pa man na-rescue sang taga-ICAG volunteers.

Read backstory: https://www.facebook.com/aksyonradyoiloilo720/videos/961502322241239