Pagdepensa sang korona sang Dinagyang Festival sa Aliwan Fiesta ginapreparahan sang Tribu Pan-ay
ILOILO CITY – Kasaysayan sang Panay ang mangin kaundan sang performance sang Tribu Pan-ay sang Fort San Pedro National High School sa tiun nga mag-compete sa Aliwan Fiesta 2024.
Nagkampeon ang Tribu Pan-ay sa bag-o lang natapos nga Dinagyang Tribes Competition, highlight sang Dinagyang Festival 2024 gani sila ang ma-represent sang Dinagyang Festival sa Aliwan Fiesta.
“We will stick to the concept gihapon nga Panhay which is actually the history of Panay Island. We will be bringing the history – the story of how Panay have its name nga Panay. May mga enhancement lang kami nga himuon sa amon nga mga props and then sa performance,” suno kay Principal Melanie Tabaculde.
Gin-aku ni Tabaculde nga indi na bag-o sa tribu ang Aliwan Fiesta tungod gintiglawas nila ang Dinagyang Festival sang 2012 sa diin nakuha nila ang kampeonato.
Ginpasalig man niya nga preparahan nila sang maayo ang Aliwan Fiesta agud madepensahan ang korona sang Dinagyang Festival sa prestihiyoso nga festival competition sa bug-os nga pungsod. Madumduman nga Dinagyang Festival ang nagkampeon sang nagligad paagi sa Tribu Parianon sang Molo.
“We will be doing our best gihapon kay we are very aware nga Aliwan Fiesta na ang amon intrahan nga contest. So, kinahanglan kun ano ang level sang amon nga preparation sa [Dinagyang Festival] kinahanglan to the highest level pa gid ang amon ubrahon,” suno kay Tabaculde.
Ang Aliwan Fiesta, gina-organize sang Manila Broadcasting Company (MBC) nga nagapanag-iya sa Aksyon Radyo Iloilo.
