3 ka balay nasunog sa Pototan
ILOILO — Naglab-ot sa P1 million ang kahalitan sang nasunog ang tatlo ka mga balay sa Barangay Cau-ayan, Pototan, las-2:51 kahapon sang hapon, Pebrero 15.
Suno kay Fire Office 1 Jay-R Pamplona, Arson Investigator sang Pototan Fire Station, totally damaged ang duha ka mga balay, kun sa diin isa ang human sa light materials kag sa concrete ang isa. Himo naman sa concrete materials ang partially-damaged nga balay.
Ginpahayag ni Pamplona nga may tawo nga naglabay kag nakakita sang pagkalayo sang isa sa mga balay. Gilayon niya nga gintawag ang lalaki nga naga-istar nga nagalawig sang iya kanding nga nagakasunog na ang ila balay kag nag-report sa Pototan BFP.
Gintawag naman sang lalaki ang iya bayaw nga naga-opisina sa second floor sa pihak nga balay tungod nagakasunog na ini.
Nakaagum sang first degree burn ang babaye samtang nagapaguwa siya sa balay.
Nagapadayon ang imbestigasyon sang Pototan BFP agud matumod ang ginhalinan sang kalayo.
