AJUY, ILOILO—Nadakpan sang kapulisan ang mga suspects sa pagransak sa cell site sang service provider sa Ajuy kag nagkuha sang tatlo ka solar panel kag mga rectifier batteries sang Marso 10 nga na-recover man sang ulihi.
Suno kay PLt. Randy Lambungan, hepe sang Ajuy Municipal Police Station, wala nagmadinalag-on ang apat ka mga suspects sa pagdala sang ila nakuha nga kagamitan sang na-intercept sang kapulisan.
Suno kay Lambungan, gab-i sang Marso 8 sang nakasulod sa cell site ang mga suspects kag nakuha ang mga solar panel kag batteries. Pero tungod nga mabug-at ang mga ini, ginbilin lang anay nila sa isa ka lugar nga sakup man sang cell site ang ila ginkawat pero nakit-an sang naga-roving nga security guard.
Gin-report sang security guard ang insidente sa kapulisan kag gilayon nga nag-deploy sang mga pulis sa area sa pagpati nga balikan sang mga suspects ang ila ginkawat kun makakita sang makargahan.
Marso 10 sang kaagahon sang nakita sang naka-standby nga mga pulis sa area nga nagbalik ang mga suspects gani nga na-intercept sila antes pa makarga sa salakyan ang mga solar panels kag batteries.
Gin-identify ang mga nadakpan kanday Elmer Guzman sang Banago, Bacolod City; Erwin Arivato sang Pahanokoy, Bacolod City; Rogelio Pendon sang Bacolod City; kag Franklin Laru-an sang Don Esteban, Lapuz.
Nagaguwa sa pag-imbestigar sang police nga tinawo sang kontraktor sa amo nga cell site ang duha sa apat ka mga suspects rason nga nangin mahapos sa ila ang pagkuha sang mga batteries kag may ideya sa mga pasikut-sikot sa sulod sang cell site.
Suno kay Lambungan, matawag nga organized syndicate group ang mga nagkaladakpan tungod sila man ang sa likod sang pagkawat sang battery sa cell site sa Zarraga sang Pebrero 24, kag sa cell site sa Alimodian.
Na-recover sa mga suspects ang duha ka mga salakyan nga posible ila sakyan sa pagkarga sang ila kinawatan kag magpalagyo. Na-recover man ang 22 ka rectifier batteries nga nagabalor P1 million.
Ginpasakaan na sang kaso nga robbery ang apat ka mga suspects.
