ILOILO CITY —Gin-athag ni Mayor Jerry Treñas nga wala sang lockdown nga matabu bisan ginpa-idalum ang siyudad sa state of calamity tungod sa pertussis outbreak.
Gin-ako sang alkalde nga madamo siya sang pamangkot nga nabaton kun may lockdown gani nagpaguwa siya sang statement.
“There is no lockdown; the ones at risk are those children without the Pertussis vaccination, which is usually included in the DPT vaccines for children. We are only going to ramp up the vaccination of children,” suno kay Mayor Treñas.
Marso 26 sang gin-aprubahan sang Sangguniang Panlungsod ang rekomendasyon sang City Disaster Risk Reduction and Management Council nga state of calamity tungod sa na-record nga 16 ka kaso (as of March 26) sang pertussis.
Suno kay Dr. Rolando Jay Fortuna, assistant department head sang City Health Office, bisan kalabanan mga kabataan ang vulnerable nga sektor sa balatian, mahimo sa gihapon nga mangin carrier ang mga adults.
Makalalaton suno kay Fortuna ang pertussis apang malikawan paagi sa pagpabakuna.
Pila sa mga sintomas sang pertussis ang pagbarukoy sang ubo nga nagalawig sang duha ka semana, nabudlayan sa pagginhawa, pagsuka tungod sang sobra nga pag-ubo kag pagpalanggit-um.
