ILOILO — Ginkumpirmar ni Iloilo Governor Arthur Defensor, Jr. nga masumpa bilang miyembro sang Partido Federal ng Pilipinas si Raisa Treñas-Chu nga una na nagkumpirmar nga mapadalagan sa pagka-congresswoman sa Iloilo City sa 2025 elections.
Hiwaton ang oath taking sa Abril 10 kaupod ang pila ka mga lideres halin sa siyudad kag probinsya sang Iloilo kag Negros Occidental.
Suno kay Defensor, may mga incumbent man nga konsehal sa syudad ang maupod kay Chu sa pagsumpa sa nasambit nga partido.
Ginbuyagyag man sang gobernador nga mapabilin si Iloilo City Mayor Jerry Treñas sa iya partido nga National Unity Party (NUP).
Ang Partido Federal ng Pilipinas ang ulihi nga partido nga gin-intrahan ni Defensor kag amo man ang partido ni President Ferdinand Marcos, Jr. sang 2022 Presidential Elections.
Si Defensor ang regional chairman sang PFP.
