2 ka estudyante nalumos sa Tigbauan; 1 patay, 1 estable na
ILOILO — Patay ang isa ka estudyante samtang estable na sang isa pa sang nalumos sa Barangay Namocon, Tigbauan mga las-5:56 kahapon sang hapon.
Suno kay PMSg Amy Jerlyn Acevedo, imbestigador sang Tigbauan MPS, tungod sa mabaskog nga hangin kag balud nalumos ang mag-classmate nga kanday Frank Tayhopon kag Julius Lagunday, lunsay 18-anyos kag residente sang Barangay Isian, Tigbauan.
Ginpahayag ni Acevedo nga naghagaday ang 13 ka mag-classmate nga maglagaw sa bakante nga lote malapit sa baybay pagkatapos sang ila on the job training (OJT) sa isa ka resort.
Dugang niya, naligo ang walo ka mga lalaki samtang nagpabilin sa higad ang lima ka mga babaye.
Nadugayan ang paglangoy-langoy sang mga estudyante antes nila natalupangdan nga wala na ang duha ka upod, gani nagpangayo sila sang bulig sa mga tawo sa palibot.
Nag-responder man ang mga personnel sang Philippine Coast Guard kag Tigbauan Emergency Rescue Team (TERT).
Una nga na nakita si Lagunday nga may animo pa samtang nalab-utan isa ka oras kag nakita si Tayhopon nga gilayon gindala sa ospital tungod wala na sang animo. Pag-abot sa ospital gindeklarar siya nga dead on arrival.
Sa imbestigasyon sang police, mabaskog ang hangin kag balud sang mga oras nga nagalangoy ang mga estudyante kag ginapatihan kantilado ang tubig sa amo nga area. —via Maria Kayla Tingzon
