Magagmay nga drivers/operators sang traditional PUJs nagapanawagan kay PBBM nga indi pagdayunon ang pag-phaseout sang traditional jeep

ILOILO CITY – Nagalibog ang ulo sang pila ka mga drivers/operators kun diin sila makuha sang kuwarta agud ibuhi sa ila pamilya tungod wala sila nakapa-consolidate sa korporasyon ukon kooperatiba para sa Public Utility Vehicle Modernization Program sang gobyerno.

Suno kay Mr. Robert Ventura, nagapanag-iya kag naga-drive sang isa ka traditional unit sa sulod sang 21 ka tuig, wala siya nagpa-consolidate tungod base sa iban nga operators nga nagsulod sa kooperatiba, wala man nagtupa ang ginpromisa nga dividendo.

Nagprangka man si Ventura nga indi siya makasarang magbayad sang capital build-up, membership fee kag daily dues kun magsulod sa kooperatiba tungod naga-isahanon lang ang iya unit.

“Ang nabatyagan namon nga pinakamasakit sini nga kun dulaon ang amon traditional jeepney, ano na lang ang ipa-eskuwela namon sa amon kabataan? Kay diri kami nagakuha sang adlaw-adlaw namon nga kinahanglanon ilabe na ang ibakal sang pagkaon,” suno kay Ventura.

Suno naman kay Mr. Bernabe Villanica, 30 ka tuig nga nagabyahe, nagtipon siya sang kuwarta paagi sa pagbiyahe kag nagpangutang agud makabakal sang isa ka unit gani masakit sa iya kun indi na pagpasugtan ang mga traditional jeepneys.

Wala nagpa-consolidate si Villanica tungod base sa ginsugid sang iya mga kaupdanan nga driver/operator sadto nga madata ang korapsyon sa mga kooperatiba. Sa pagkamatuod, suno sa iya, naghinulsol sila nga nagsulod sa kooperatiba tungod wala sang dividendo nga nabaton tubtob subong.

“Ang akon subong nga pamilya, amo na ang ginakuhaan ko sang pagkaon [ang pagbiyahe sang PUJ] para sa amon pamilya pero dulaon pa. Kun mangita kami sang obra, may edad na kami kag mabudlay na magpangita sang obra,” suno kay Villanica.

Ginpabutyag naman ni Mr. Rolando Alsebar nga ginsuptan niya sang nagtrabaho siya bilang OFW ang ginbakal nga duha ka units sang 2005 agud magserbe nga palangabuhian kun indi na makatrabaho sa abroad.

Gin-aku ni Alsebar nga nakatambong siya sa orientation para magsulod sa kooperatiba, pero nakita niya nga indi maayo ang pagpamalakad gani wala na niya ginpadayon.

Bisan nakatapos na sa pag-eskwela ang iya kabataan, ginasaligan niya ang pagbiyahe sang iya PUJ agud may mabakal sang kaugalingon nga kinahanglan sa pang-adlaw-adlaw.

Ginpahayag naman ni Mr. Rico Diolosa, naga-operate sang isa ka unit, nga tinuig siya nga nagsupot agud makabakal sang PUJ nga magaserbe niya nga palangitan-an.

Suno sa iya, ginasaligan niya para sa maintenance sang bulong ang income sa iya PUJ gani nagakabalaka siya kun diin na makuha sa tiun nga mag-untat sa pagbiyahe.

Pareho nga nagpahayag ang apat nga indi nila pag-ibaligya ang ila tagsa ka mga units bisan indi na makabiyahe tungod ginpangabudlayan nila ini kag may sentimental value para sa ila.

Nagtakop na sang Abril 30 ang pagpa-consolidate sang traditional jeepneys kag wala na sang extension pero puwede sila gihapon makabyahe tubtob Mayo 15. —Firingline