Lalaki nasapwan nga patay sa sulod sang bubon sa Guimaras

Ginabanta 25 ka tapak ang kadalumon sang bubon kun diin nasapwan ang bangkay sang 45-anyos nga lalaki sa Sitio Hulot, Brgy. Poblacion, Jordan, Guimaras pasado las-10 kahapon sang aga, Mayo 12.

Ginkilala ang napatay kay Ronel Nabor, tricycle driver kag residente sang nasambit nga barangay.

Suno kay Police Captain Ma. Jona Casano, officer-in-charge sang Jordan Municipal Police Station, ulihi nga nakit-an ang lalaki sang iya tiyo pasado las-10:30 sang gab-i nga nagapanyapon kag nakainom sang makahulubog nga ilimnon.

Nagaguwa sa imbestigasyon sang police nga nag-inum-inom pa ang lalaki sa tiyangge sang gab-i antes siya nasapwan.

Nagtulog siya sa papag sa guwa sang ila balay nga ginabanta tatlo tubtob apat ka metros ang kalayuon sa bubon nga iya nahulugan.

Nagapati ang police nga wala nakapangaman ang lalaki sang nahulog siya sa bubon tungod naka-inom siya.

Wala man ginadula sang police ang posibilidad nga may foul play sa natabo.

Ginahulat sang police ang desisyon sang pamilya kun ipa-autopsy ang bangkay sang lalaki. — via