Mga barangay nga sakop sang apat ka dugang nga police stations sa Iloilo City naplastar na
Gintunga sang Iloilo City Police Office ang mga barangays nga balantayan ukon cover sang idugang nga apat ka police stations sa siyudad.
Suno kay ICPO director Police Colonel Joeresty Coronica, katuyuan sang bag-o nga mga estasyunan nga mapalapit sa pumuluyo ang mga serbisyo sang police kag madasig nga makaresponder kun kinahanglan.
21 ka barangays sa City proper ang sakop sang Police Station 7 nga ginpahamtang ICARE Center sa Brgy. Tanza Esperanza; walo ka barangays sa Lapuz ang Police Station 8 nga ipahamtang sa Bo. Obrebo, Lapuz; 28 ka barangays sa Jaro ang Police Station 9 nga ipahamtang sa MH Del Pilar; kag pito ka barangay sa Mandurriao ang Police Station 10 nga temporaryo ibutang sa Gaisano ICC ICARE Center.
May gindugang na nga duha ka salakyan ang regional headquarters para sa bag-o nga police stations kag nagpromisa man ang City Government nga mahatag sang dugang, suno kay Coronica.
Ginpahayag ni Coronica nga isa pa lang sa apat ka idugang nga police stations ang may detention facility gani kun operational na kag may ma-aresto ang kapulisan, temporaryo sila nga ibutang sa iban nga police stations.
Ang Police Station 1 nahamtang sa General Luna, City Proper; Police Station 2 sa La Paz, Police Station 3 sa Jaro, Police Station 4 sa Molo, Police Station 5 sa Mandurriao kag Police Station 6 sa Arevalo.
Buksan sa Hulyo 2 ang dugang nga mga police stations sa diin makadto si PNP Chief Police General Rommel Francisco Marbil. — via Aksyon Firingline
