DepEd 6 target nga malapawan ukon matupungan ang numero sang mga enrollees sa rehiyon sa pagsugod sang enrollment para sa SY 2024-2025
ILOILO – Target sang Department of Education (DepEd) – Western Visayas nga matupungan ukon malapawan ang numero sang mga enrollees sang School Year 2023-2024 sa bug-os nga Rehiyon 6.
Ini suno kay DepEd 6 Spokesperson Hernani Escullar, Jr. sa pagsugod sang enrollment para sa School Year 2024-2025 subong nga adlaw, Hulyo 3.
Base sa data sang DepEd 6, 1,809,425 ka mga learners ang nag-enroll sa mga pampubliko nga eskwelahan sa bug-os nga Western Visayas sang nagligad nga school year.
Dapat suno kay Escullar nga maka-eskwela kag mahatagan sang dekalidad nga edukasyon ang tanan nga kabataan tungod libre ang pag-eskwela sa mga public schools.
Gin-aku ni Escullar nga nagdamo ang mga estudyante nga nagsaylo sa mga pampubliko nga eskwelahan halin sa private schools sang ginlibre ang tuition sa mga higher education institutions (HEIs) kag sa tiun sang COVID-19 pandemic.
Ginpasiguro man niya nga wala sang estudyante nga balibaran sa mga pampubliko nga eskwelahan.
Mabukas ang klase sa mga public schools sa Hulyo 29.
