Nag-overheat nga saksakan sang refrigerator ginapatihan ginhalinan sang sunog sa Oton

ILOILO — Nag-overheat nga saksakan sang refrigerator ang ginalantaw nga ginhalinan sang sunog sa Barangay San Nicolas, Oton kahapon sang hapon, Agosto 4.

Suno kay SFO2 Jose Niones II, imbestigador sang Oton Municipal Fire Station, sa balay ni Kenneth Perocho nabutang ang refrigerator nga nakasaksak gani posible naglupok.

Nadalahig man sa sunog ang tatlo pa ka mga balay nga ginapang-iyahan sang utod ni Kenneth nga si Arnel, ila iloy nga si Ramona kag sang ila tiya nga si Patria Erme.

Totally damaged ang balay sang mag-utod kag ila iloy samtang partially damaged naman ang gina-estaran sang mga Erme.

Human naman sa mixed materials ang balay.

Una na nga ginpabutyag ni Salvacion, asawa ni Arnel, nga nakabati sang lupok ang iya bata halin sa balay ni Kenneth antes nag-ibwal ang kalayo.

Wala sang tawo sa balay ni Kenneth sang natabu ang sunog tungod may ginkadtuan sila nga birthday.

Apang ginpahayag ni Kenneth nga naka-off ang tanan nila nga mga appliances.

Ginahibalo pa sang mga bombero kun pila ang balor sang kahalitan sa nagluntad nga sunog. — via Aksyon Maria Kayla Tingzon

Gindeklarar ang fire out las-5:50 sang hapon.