Dengue outbreak posible ideklarar sa probinsya sang Iloilo

ILOILO — Ginaproseso sang Iloilo Provincial Health Office (IPHO) ang record sa mga kaso sang dengue sa probinsiya agud ipasa sa Department of Health (DOH) para i-rekomendar ang pagdeklarar sang province-wide outbreak.

Base sa record sang IPHO, 36 sa 43 ka local government units (LGU) sa probinsya ang may positibo nga kaso sang dengue nga nagsobra sa epidemic kag alert thresholds sang amo nga balatian.

Sa data, may 3,608 ka kaso nga may anum ka napatay tungod sa dengue sa probinsya.

Sa ginhimo nga meeting sang IPHO upod ang 43 ka barangay health workers (BHW) presidents sa 43 ka LGU, gin-report nga nagsaka sa 190 ka mga barangay sa probinsiya ang may clustering of cases sang dengue.

Kun ideklarar ang dengue outbreak sa probinsiya, mahimo magamit sang mga LGUs ang ila quick response fund agud maghimo sang localized response kontra dengue.