ILOILO — Nagpasar sang resolusyon ang Provincial Disaster Risk Reduction and Management Council (PDRRMC) subong nga hapon nga nagarekomendar nga ipaidalom sa state of calamity ang probinsya tungod sa madasig nga pagdamo sang dengue cases.
Suno kay PDRRMO Chief, Ret. Colonel Cornelio Salinas, tapuson sang iya opisina ang pag-draft sang resolusyon agud nga mapasulod sa agenda sang Sangguniang Panlalawigan para nga matalakay sa masunod nga regular session.
Ginpahayag ni Salinas nga nakasulod na ang Iloilo sa criteria sang NDRRMC para makadeklarar sang state of calamity tungod duha na ka local government unit ang nagdeklarar sang state of calamity –ang Passi City kag Tigbauan.
Pananglitan nga ma-aprubahan sang Sangguniang Panlalawigan ang resolusyon, mahimo nga maka-access ang 43 ka LGUs sa ila calamity fund agud nga ibakal sang mga kinahanglanon nga makabulig sa pagresponder sa dengue.
Sa 32nd Morbidity Week Report sang Provincial Health Office, yara na sa 4,595 ang kaso sang dengue ang sa bug-os nga probinsiya nga may 10 ka mga napatay, apat ang nalista nga mga bag-o nga napatay.
Mapaguwa sang dugang nga preventive measures si Gov. Arthur Defensor, Jr. agud matapna ang pagdamo sang kaso sang dengue sa probinsiya. —via Cedrick Anona
