ILOILO — Ginkumpirmar sang iloy nga napatay samtang ginabulong sa ospital ang iya duha ka tuig nga bata nga lalaki nga napaso ang bilog nga lawas sang nagsulod sa kaldero nga may mainit nga sabaw sa Barangay Pantalan, Carles sang Agosto 8.
Suno sa iloy nga si Janette Gallardo, wala niya natalupangdan nga yara na sa likod niya ang iya bata kag sang pagbalikid niya, nakita niya na lang nga nagsulod na sa kaldero nga naga-unod sang sabaw sang batchoy ang iya bata.
Ginpahayag ni Janette nga posible nagahampang ang iya bata kag nakadanlog sa bato rason nga nakapungko sa takop sang kaldero kag nahulog sa sulod. May posibilidad man suno sa iya nga pungkuan kuntani sang bata ang kaldero.
Napaso ang lawas sang bata halin sa iya dughan tubtob sa tiil gani gilayon nga nagpangayo sang bulig si Janette kag gindala sa ospital sa Balasan ang bata.
Samtang nagapadulong sa ospital, nakita ni Janette nga nagapanit-panit na ang lawas sang iya bata tungod sa pagkapaso.
Nagtiner pa sila sang isa ka adlaw sa ospital sa Balasan antes gin-refer sa Western Visayas Medical Center.
Gintinguhaan pa masalbar ang bata, pero Agosto 13 sang gab-i napatay ang bata suno sa iloy.
Gindala na sa punerarya ang lawas sang bata kag natalana dal-on sang pamilya sa ila balay sa Domingo. — via Aksyon Maria Kayla Tingzon
