Gin-ako ni Iloilo City Mayor Jerry Treñas nga siya ang nagahatag sang kwarta sa iya empleyado agud mag-boost sang post sa iya Facebook page.
Ini ang paathag sang alkalde sa masobra 500 thousand pesos nga ginbayran sa idalum sang ngalan ni Ma. Ruthmar Gabileo nga na-assign sa City Mayor’s Office bilang social media copywriter.
Suno kay Mayor Treñas, tag-200 pesos ang ginabayaran niya sa boosting sang mga posts ilabe na ang may kaangtanan sa mga nakuha nga awards sang siyudad, mga proyekto, turismo kag iban pa nga accomplishments.
Sugod Agosto 2020 tubtob Agosto 2024, may kabug-usan nga one million, 71 thousand 372 pesos ang nagasto sang alkalde sa boosting sang mga FB posts.
Sa data halin sa social media page sang alkalde, nagapakita nga sang Agosto 7 kag Agosto 13, thirty-six thousand 621 pesos ang ginbayad sa ads nga ginalakipan sang disclaimers nga ginabanta sa masobra 5,000 pesos kada adlaw.
Lakip sa mga nagpondo sa gin-boost nga FB posts sang alkalde amo si Gabileo nga nagalab-ut sa 520,853 pesos; Mayor Treñas nga may 486,934 pesos kag social media marketing agency nga Dame Digital nga 55,600 pesos.
Una na ginpaathag ni Mayor Treñas nga kabahin sang iya trabaho bilang alkalde kag lider sang siyudad nga mapahibalo sa iya mga nahimo para sa iya mga constituents. — via Aksyon Justice Savannah Pamplona
