San Isidro, Jaro Punong Barangay Ronela Juaneza ginsuspender sang 60 ka adlaw

ILOILO CITY — Ginkumpirmar ni San Isidro, Jaro Punong Barangay Ronela Juaneza nga nabaton niya ang suspension order ni Iloilo City Mayor Jerry Treñas.

Suno kay Juaneza, nabaton niya ang kopya sang suspension order mga las-kuwatro kaina sang hapon kag epektibo subong nga adlaw.

Gin-ako ni Juaneza nga ginapaabot niya na ang mandu bisan nga wala pa sang preliminary investigation sa reklamo batuk sa iya.

Nag-ugat ang issue sa reklamo sang pila ka barangay kagawad sang San Isidro batuk sa kapitan nga misconduct, abuse of authority, kag paglapas sa anti-graft and corrupt practices act.

Una na ginpa-athag ni Iloilo City Councilor Rex Marcus Sarabia, chairman sang Committee on Personnel, Good Government, Public Accountability, and Oversight, sa Konseho nga ginreklamo ang ginpahayag iregularidad sa pag-release ni Juaneza sang pondo sang barangay. Ginpanginwala ini Juaneza.

Ginrekomendar sang City Council ang 60-day suspension sang kapitan kag nagtukod sang ad hoc committee nga maga-imbestigar sa reklamo.

Magapungko nga barangay kapitan sa sulod sang 60 ka adlaw si Barangay Kagawad Ruby Gallano. —via Aksyon Reports Afternoon Edition