Suspected case sang Mpox sa Iloilo City negatibo ang laboratory result — CHO
ILOILO CITY – Negatibo sa Monkeypox ukon mpox ang suspected case nga na-monitor sang City Health Office (CHO) sa siyudad subong nga bulan.
Suno kay CHO Head, Dr. Anabelle Tang, nakitaan sang sintomas ang pasyente pareho sang rashes gani ginkuhaan sang specimen kag ginpadala sa Research Institute for Tropical Medicine (RITM) pero negatibo ang resulta. Wala suno sa iya, sang travel history sa guwa sang pungsod ang pasyente.
“We are also watching the Monkeypox. Sa subong, we had one suspect case, actually pero it turned out negative. Wala siya sang history of travel abroad,” suno kay Dr. Tang.
Ginpasiguro ni Tang nga hugot nila ginabantayan ang balatian nga una na gindeklarar sang World Health Organization (WHO) nga global public health emergency. Subong nga bulan, na-record sang Pilipinas ang labing una nga kaso para sa subong nga tuig.
Nagpanugyan ang CHO sa publiko nga masami gid magpanghugas sang kamot agud malikawan nga matapikan sang balatian lakip na ang mpox.
Ang monkeypox, naghalin sa mga sapat kag mahimo nga makalaton sa tawo paagi sa close contact sa infected individual, suno sa mga health authorities. Una nga gintawag nga monkeypox ang balatian tungod una nga na-identify ang virus sa mga amo nga ginpaidalum sa research sa Denmark sang 1958, apang natukiban man ang balatian sa pila ka mga sapat kag kalabanan sa mga ilaga.
