UPDATE: Tiyo nga nakatiro patay sa iya hinablos sa San Dionisio nadakpan
ILOILO — Nadakpan sa hot pursuit operation sang police ang tiyo nga nakatiro sa iya 32-anyos nga hinablos sa Brgy. Pase, San Dionisio sang Agosto 25 sang gab-i.
Suno kay Police Captain Edward Villanis, hepe sang San Dionisio Police Station, ginlibot nila ang pila ka mga barangays sa Mt. Opao sa Brgy. Pase tungod madamo sila sang nabaton nga impormasyon sa ginapahamtangan sang suspek nga si alyas Joey, 50-anyos.
Ginsaysay ni Captain Villanis nga sang napapanaug na ang bangkay sang biktima nga si Jay-ar kahapon sang aga halin sa bukid, nagdiretso ang mga pulis sa Brgy. Talo-ato kag Brgy. Mandu-awak agud pangitaon ang suspek.
Nagkadto man ang mga pulis sa Brgy Tiabas tungod naghambal ang suspek sa iya paryente nga ma-surrender na siya, pero pag-abot sang police wala siya sa lugar.
Pagkatapos sini, nagbalik naman ang police sa Brgy. Pase tungod sang nabaton nga impormasyon nga yara ang suspek, pero wala siya nakita didto.
Posible nahadlok ang suspek sa police kag indi magpakita samtang masanag pa, suno kay Villanis.
Makapila ka beses nga nagbalik sa police station ang kapulisan agud magpahuway kag nagbalik naman taklad sa bukid tubtob nagkadto sa Brgy. Capinang sa diin nagpanago ang suspek sa balay sang iya utod nga wala na gina-istaran.
Las-5:30 na kahapon sang hapon sang nadakpan ang suspek sang nagpalapit siya sa barangay kagawad. Nagapang-alang-alang pa siya, pero gin-istorya sang mga pulis nga mas maayo nga indi na siya magpalagyo.
Ginabanta sa apat tubtob lima ka kilometros ang kalayuon sang Brgy. Capinang sa town proper.
‘GIN-UNAHAN NIYA LANG’
Sa pagpangusisa sang police sa suspek, ginpabutyag niya nga nagkadto ang biktima sa iya balay kag naghana nga lampusan siya sang baston gani gin-unahan niya na lang tiro kag naigu sa dughan ang biktima.
Sa impormasyon sang police, nagpamahog na sadto ang biktima sa suspek nga patyon niya tungod sang ila away sa duta kag daan nga hiligut-anon.
Ginapreparar na ang kaso nga murder batok sa suspek. —via Farrah Mae Morano
