Manghod patay sang ginlabu sang iya magulang sa Maasin

ILOILO— Patay ang 46-anyos nga manghod sang ginlabo sang iya 52-anyos nga magulang sa Barangay Abilay, Maasin la-1:30 kahapon sang kaagahon, Agosto 29.

Suno kay Police Major Jose Nemias Pamplona, hepe sang Maasin Municipal Police Station, pareho nga nagpauli nga hubog ang mag-utod.

Ginpabutyag sang amay sang mag-utod nga wala na niya nabatian nga nagbaisay ang duha sang nag-abot sa ila balay, pero nakita na lang nga nalabuan na ang manghod.

May pilas sa wala kag tuo nga kamot, kag liug ang manghod, suno sa police.

Sa pagpangusisa sang police sa suspek, ginpabutyag niya nga nalabuan niya ang biktima tungod salawayon kag wala nagapataha.

Masami man mabatian sang mga kasilingan nga naga-away ang mag-utod kun makainum, suno sa police.

Nagpalagyo pa ang suspek pero nadakpan sang kapulisan. — via Aksyon Farrah Mae Morano