Negosyante nga nakaagi padalagan mayor sa Mina, Iloilo pilason sa shooting incident

ILOILO — Pilason ang 66-anyos nga negosyante sang naigo sang bala sang kaugalingon nga pusil samtang nagailis sang magazine sa tunga-tunga sang pagtiruhay nila sang wala pa makilal-an nga lalaki.

Ang biktima ginkilala kay Teodoro Camarista sang Amiroy, Mina nga nangin kandidato sa pagka-mayor sa banwa sang 2022 elections.

Suno kay Police Staff Sergeant Anthony Yap sang Mina Police Station, pasado las-dos kaina sang kaagahon sang nabatyagan ni Camarista nga nagataghol ang ila mga ido.

Ginpukaw niya ang iya live-in partner agud lantawon kun ano ang ginataghol sang mga ido.

Diri na kag nasiplatan sang iya live-in partner nga may landong nga nagapasaka sa ila hagdanan.

Nagsinggit si Camarista nga “sin-o ran?” kag didto na natabo ang paglinupok kag nagbalos man si Camarista palupok.

Indi ma-identify ni Camarista ang mga nagsulod sa ila balay tungod patay ang tanan nga suga.

Suno sa police, nagpabutyag si Camarista sa iya statement nga wala man siya sang kontra kag nakibot sa natabo.

Napilasan sa wala nga tiil ang negosyante, samtang wala naigo ang iya live-in partner. —via Justice Savvanah Pamplona