Lalaki patay sang ginhatok-hatok labo sang iya nakaupod sa ilimnan sa Barotac Viejo

ILOILO — Patay ang 54-anyos nga lalaki sang ginhatok-hatok labo sang 70-anyos nga suspek sa Sitio Pal-ak, Brgy. Poblacion, Barotac Viejo las-10:20 sang gab-i sang Setyembre 2.

Suno kay Police Major Felix Alianza Jr, hepe sang Barotac Viejo Municipal Police Station, nag-inum-inom ang suspek nga si Alonie kag ang biktima nga si Alex sang Brgy Sincua, Lemery antes natabo ang insidente.

Sa balay sang suspek nag-inom ang duha.

Sa imbestigasyon, pagkatapos inom , nagpahuway na ang suspek kag ginhambalan man ang biktima nga magtulog naman, pero wala siya untat nga nagawinakal, suno sa police.

Tungod sini, nagbangon ang suspek kag ginkuha ang lagaraw sa iya tupad kag ginlabo ang biktima, suno sa police.

Ginhingagaw pa dala sa Gov. Niel D. Tupas, Sr District Hospital ang biktima pero wala na natabangan tungod sang naagum nga pilas sa ulo, nawong, tuo nga kamot kag iban pa nga parte sang lawas.

Nag-surrender naman ang suspek sa police.

Hinubog ang motibo sa krimen, suno sa police, tungod wala man sang daan nga away ang duha kag masobra duha pa lang ka semana nagkilalahay. — via Aksyon Farrah Mae Morano