$800 kag P1.5 million nga balor sang alahas nakuha sa balay sang mag-asawa nga ginkawatan sa Dumangas

ILOILO — Nakuha sang wala pa makilala nga suspetsado ang $800 nga cash kag P1.5 million nga balor sang alahas sa balay sang mag-asawa sa Barangay Ilaya, Dumangas kahapon sang hapon.

Suno kay Police Major Samuel Vipinosa, hepe sang Dumangas Municipal Police Station, nag-agi ang suspek sa kusina sang balay sa likod.

Dugang pa ni Vipinosa, ginsaka sang suspect ang balay gamit ang hagdanan nga yara na nga daan sa lugar, ginguba ang kisame nga human sa plywood kag didto nag-agi agud makasulod.

Sang nakita ang sitwasyon sang balay, nagalinapta na ang mga gamit sa sala, bukas ang mga kwarto kag sa sala nakita ang jewelry box.

Wala sang tawo sa balay sang natabu ang insidente tungod naga-obra ang mag-asawa kun adlaw kag gab-i na nagapauli.

Ginalantaw naman sang police nga duha tubtob tatlo ang may kahimuan sang krimen.

May CCTV camera sa atubang sang balay pero wala sang nabutang sa likod sa diin nag-agi ang mga suspetsado. — via Aksyon Maria Kayla Tingzon