Supervisor sang construction supply nakuhaan sang masobra P1 million nga balor sang suspected shabu sa Molo

ILOILO CITY — Nakuhaan sang P1,020,000 nga balor sang suspected shabu ang supervisor sang construction supply sa drug bust operation sang Regional Police Drug Enforcement Unit 6 sa Brgy. San Pedro, Molo las-11:30 kagab-i.

Ginkilala ang nadakpan kay alyas Boss, 28-anyos nga taga-Ajuy pero nagatenir sa Leganes tungod nagaobra sa construction supply company.

Suno kay Police Captain Ryan Christ Inot, team leader sang RPDEU, may nagapadala sang supply sang illegal drugs sa subject paagi sa delivery sang construction supply sa probinsiya kag siyudad sang Iloilo.

Nagabug-at sang 150 grams ang na-recover nga 26 sachets sang suspected shabu sa subject.

Preso sa Molo police station ang subject kag natalana pasakaan sang kaso nga paglapas sa Republic Act 9165 ukon ang Dangerous Drugs Act sang 2002. — via Aksyon Paula Elambayo