1 patay sang nadisgrasya ang pribado nga salakyan kag 2 ka motorsiklo sa Bingawan

ILOILO — Patay ang driver sang Yamaha STX nga motorsiklo sang nakabunggo sa pribado nga salakyan sa Brgy. Agbao, Bingawan pasado la-1 sang kaagahon sang Setyembre 20.

Suno kay Police Lieutenant Philip Tecson Girao, deputy station commander sang Bingawan Municipal Police Station, nagasundanay ang duha ka motorsiklo sa kurbadahon nga dalan sang Brgy. Agbao sang nasugata ang Toyota Revo nga salakyan.

Ginpahayag sang police nga madasig ang pagpadalagan sang duha ka motorsiklo rason nga nakabunggo sa salakyan.

Gintinguhaan pa sang driver sang salakyan nga likawan ang nagasundanay nga motorsiklo pero nalab-ot gid ang yara sa ulihi rason sang pagbunggun-anay.

Wala sang suksok nga helmet ang duha ka drivers sang motorsiklo, suno sa police.

Pareho nga gindala sa ospital ang drivers sang motorsiklo pero dead-on-arrival ang isa. Samtang detained sa Bingawan Police MPS ang driver sang Toyota Revo. — via Aksyon Paula Elambayo